Keina Espiñeira é profesora axudante doutora na Facultade de Socioloxía da Universidade da Coruña, onde traballa vinculada ao Equipo de Investigación Sociedades en Movemento (ESOMI). Doutora en Ciencias Políticas e da Administración pola Universidade Complutense de Madrid (2016), as súas liñas de investigación céntrase nas políticas de migración, asilo e fronteiras desde perspectivas e enfoques críticos como son as teorías pos-coloniais e os estudos de raza.

Belén Fernández Suárez é doutora en Socioloxía pola Universidade da Coruña desde 2015 e profesora contratada doutora de Socioloxía na Universidade da Coruña desde 2022. É membro do Equipo de investigación Sociedades en Movemento (ESOMI) da UDC, do Centro de Estudos de Xénero e Feministas (CEXEF, UDC), e investigadora vinculada ao Centro de Investigación Interuniversitario das Paisaxes Atlánticas Culturais (CISPAC). As súas liñas de investigación céntranse nas políticas migratorias, e máis concretamente, nas políticas de integración, ao igual, que ten traballado sobre migracións cualificadas intraeuropeas.

Luzia Oca González é doutora en Antropoloxía pola USC desde o ano 2013, e Profesora Axudante Doutora na Universidade de Santiago de Compostela, tras unha experiencia de 19 anos como docente e investigadora na Universidade de Trás-os-Montes e Alto Douro, en Portugal. Dedicou unha longa investigación á comunidade caboverdiana de Burela, que iniciou en 1998, como coordinadora das intervencións pioneiras con esta comunidade.

Sarah Lamas é Licenciada en Comunicación Audiovisual e máster en Políticas Sociales e Intervención Sociocomunitaria na especialidade de Xénero.. Ten participado activamente no activismo feminista e LGBT sendo vogal de Avante na plataforma LGBT Galega durante tres anos. Así mesmo, ten cooperado coas Brigadas Civís de Observación Internacional e no CIDECI-UniTierra Chiapas (México). Na actualidade, participa no Centro de Estudos Feministas e de Xénero (CEXEF) como coordinadora de formación e secretaria editorial da Revista Internacional de Estudios Feministas Atlánticas.

Antía Pérez Caramés é doutora en Socioloxía desde o ano 2010 e especializada en Demografía (2002) pola École des Hautes Études en Sciences Sociales (EHESS, París). É Profesora Contratada Doutora na Facultade de Socioloxía da Universidade da Coruña.  Integra o grupo de investigación ESOMI e tamén o Centro de Estudos de Xénero e Feministas (CEXEF) da Universidade da Coruña, o Arquivo da Emigración Galega do Consello da Cultura Galega e a rede internacional de investigación sobre migracións internacionais IMISCOE. As súas liñas de investigación céntranse na intersección nos estudos migratorios e feministas.

Estefanía Tarrío Maneiro é contratada predoutoral na Universidade da Coruña. A súa tese de doutoramento (en curso na actualidade) versa sobre a elaboración de cartografías dixitais das producións musicais underground en Galicia, dos xéneros rock, punk e metal. Así mesmo, é socióloga e educadora, con experiencia laboral en políticas públicas. Entre outras funcións desempeñadas, colaborou con institucións locais e autonómicas na elaboración de plans de igualdade, así como en campañas de sensibilización e divulgación en materia de xénero.

Iria Vázquez Silva é doutora en Socioloxía desde o ano 2014, está especializada en migracións internacionais e xénero. A súa especialización en estudos de xénero cursouna primeiro na U. Autònoma de Barcelona (2006) e posteriormente na Universidade de Vigo (2008). É profesora axudante doutora de socioloxía na Universidade de Vigo. Intégrase no Grupo de estudos en traballo social: investigación e transferencia (GETS-IT). As súas liñas actuais de investigación son, entre outras, a violencia machista institucional e as migracións transnacionais africanas.