O proxecto “Coidados na diáspora. Unha autoetnografía fotográfica de mulleres caboverdianas en España”, financiado polo Instituto de las Mujeres (Ministerio de Igualdade), consiste nun proceso de creación artística a través de metodoloxías visuais que busca poñer en valor as narrativas das mulleres sobre a súa propia experiencia da migración, explorando as relacións entre coidado e traballo.
‍
A través dunha serie de obradoiros de fotografía con mulleres descendentes da migración caboverdiana, embarcámonos na creación colectiva dunha exposición e dun arquivo de imaxes das mulleres na diáspora. O proxecto desenvólvese en tres localidades onde a comunidade caboverdiana se asentou desde os anos 70: Burela (Galiza), Bembibre (Castela e León) e Zaragoza (Aragón). Esta diversidade xeográfica ofrece unha perspectiva única para observar como evolucionaron os patróns de coidado a través das xeracións e dentro dos ciclos de vida familiar.