27 di marsu e dia di mudjer kauberdiana
N ten orgulho di ser mudjer kauberdiana
mudjer batalhadora
mudjer e vensedora
pur isu ki nu buska nos direitu
mudjer ta sufri un dia, pa podi vense
na undi ki nu bai
nos e mudjer kauberdiana
Iá Iá kunbosa
N fla-u nau nau kunbosa
Ka bu mexe-m, N ka ta mexe-u
A bo na kuartu ku nha maridu
A mi fika na sala mi so, ku nha mininu
kunbosa, bu atxa bo ki ten razon, ó
É nau, nau, kunbosa…
Anos e un grupu di mudjeris
Formadu na batuku
Na undi nu txomadu
Nu ta bai sen prublema
Rais di kultura
Undi nu bai nu aprizenta
Ku nos txabeta nu ta aprizenta Kabu Verdi / nos batuku
Nos batuku, nos kultura
Anos é di Portu Moskitu
Anos e fidju piskador
Erderu di pexera
Nu ten orgudju di nos zona
nu ta leba-l na nos memória
Nu ta graba-l na pensamentu
Portu Moskitu é sabi, é sabi mé
Nos freguezia é la San Juan Batista
Ma nos konsedju é la Ribeira Grande
Ma nos nu mora na Portu Moskitu
Li Portu Moskitu
Portu Moskitu é sabi, sabi mé
NHA MAI
O nha mai
nobi mes na bu bariga, mai
Dizoitu mes na bu petu
Bu da-m amor, bu da-m karinhu
Nha mai, N da-u txabi di nha korason
Nha mai ami N ka kre separason di mi ku bo
--------------- parte papiadu:
“Minis, na kel bes di tenpu antigu
nos mai ta kontaba nos
ma es ta ba txada panha lenha
mes ta ben, es ta ba Fundura panha agu
es ta ben, es ta ba bendi pexe
ma lenha ki es ba panha pa es ben bende
es ta bende 6 iskudu pa kada buru di lenha
minis, anos nu ka ten pagamentu ki nu ta da nos mai
mai é manta, ki ta kubri tudu
amor, karinhu, …lialdadi, sinseridadi,
ki nu ten pa nu da nos mai
undi ki nos mai manda-nu, nhos nu bai
ka nu tuntunhi pa nu ka bai, nau
Mininus, mai é manta; mai é manta ki ta kubri tudu”
—--------------------------------------------------
Nha mai
Ami pa bo N ta sufri
Ami pa bo N ta luta
Ami pa bo N ta mori
N ta da nha bida pa bo
Intérpretes: Gina (vocalista), Denisi, Nené, Édina, Mayra, Zuna, Djandira, Kadidja, Melisa, Ni, Simônica, Neta, Tatina (torno), Anilsa (torno). Localização: Portu Moskitu, Ribeira Grande de Santiago, Cabo Verde. Data: 5/06/2024
