Ami N ta lenbra tenpu antigu
ki mudjeris ta ba Belén
es ta bai, ta ba panha karbon
keloki es ben, es ta para na Sidadi
Ami N ta lenbra tenpu antigu
ki mudjeris ta bai Delgadu
es ta bai, es ta ba kodjeba purga
keloki es ben, es ta para na Sidadi
Ami N ta lenbra tenpu antigu
ki mudjeris ta ba Portu Moskitu
es ta bai, es ta ba buskaba pexi
keloki es ben, es ta para na Sidadi
Keloki es xinta pe-s ba diskansa
keloki es xinti ma sukuru dja da pó
e fla mudjeris pa xinta, spera manxe
ora ki manxe es ta bai Praia Maria
Keloki manxe es ta ba Praia Maria
balai na kabesa
saku na mó
mininu na kosta
ta buska pon pa fidju
ai, fidju d’oxi
e pa nu djuda mai
N nansi na Kabo Verdi
dés idja, un pais
ku nos bandera
ku nos inu nasional ki e nos orgudju
Na KV nu ka ten oro nen pitrólio
nu ka ten mina di diamanti
ma nu ten nos morabeza
ku nos paz di Diós
Mudjeris fla es ka ta mara panu
mudjeris fla ma es ka ta entra na tereru
mudjeres fla ma es ka ta da ku tornu
kantu es ben xinti,dja es difendi ses kultura
Ami N ta lenbra tenpu antigu
ki mudjeris ta ba bati
mininus ta ba panha agu
agrikultores ta ba orta
ma piskadores ta ba mar, o
kel tenpu dja bai
ka ta ben mas
Jovens di mundu interu
ten un mensaji pa N ben dexa
álkol ku droga teni mundu distruidu
keloki bu usa álkol, bu ta eskesi di familia / bu mai
álkol ku droga teni mai ku pai ta txora/sufri
Mudjer é mai
mudjer é irmá
mudjer é fidju
mudjer madrinha
mudjer é tia
mudjer é dona
mudjer é manta ki ta kubri tudu fidju
Intérpretes: Taís (vocalista), Maiara (torno), Militina, Preta Nandi, Branca, Celina, Gisela, Xi. Localização: Beku Tori - Cidade Velha, Ribeira Grande de Santiago, Cabo Verde. Data: 26/05/2024
