Rabidantis di KV, ma nos nu pasa mal na mundu
Keloki N txiga txon di Praia, fiskal ku ses po na mó
pa nu ka buska pon di fidju, so pamo nos fidju é nosenti
N teni inosenti na kasa, ka ta obi nu ka ta obi spera
Fiskal di Praia nhos dexa-m buska pon di nha mininu
Teni inosenti na skola, teni inosenti na jardim
Fiskal di Praia nhos deixa-m buska futuru di nha mininu
Keloki N txiga txon di Praia, fiskal ku ses po na mô (bis)
Pa nu ka buska pon di fidju, so pamodi nha fidju é inosenti (bis)
Nha fidju é inocente
é mi ki é mai ki é pai (di nha mininu)
Sustentu di nha bida mé leti di petu di nha mai
Ami nha manta é saia di korpu di nha mai
Nha alegria é sorisu di nha mai
Nha koraju ben di forsa di nha mai
Ami N ta ama nha mai
Ma sima mai é so mai
Ai mai, nha mai, mamá
Ma sima bo é so bo, nha mai
Ui ma sima bo é so bo, nha mai....
Ma sima bo é so bo....
Ma sima mai é mai....
Mundu di gosi dja pasa pensa
Diigualdadi na tudu kuza
pa ke Kubisa, odiu, inveja
si dja nu sabe, mas nos, ma nu ka nada
Sinseridadi ka sta mas,
amizadi gosi ka ten
undi bu kunfia, torna diskunfia
sima ta fladu, amigu ka ten mas
Nha mai dja flaba mi, amigu ka ten mas
Sima ta fladu amigu ka ten mas
Ta txiga noti ami N ta deta N ka ta durmi
N Fika ta pensa na kes minis ki sta perdedu
Nu djunta tudu nu pidi Diós na séu
Pa da-nu forsa ku koraji pa nu enkontra nos mininu
Odja Irivania ki bai ki ka ben
Edine ku Mauricio ki bai ki ka ben
Notisia tristi ki seka-m agu d’ odju
Nu djunta tudu nu pidi Diós na séu
Pa da-nu forsa ku koraji pa nu enkontra nos mininu
Pa da-nu forsa ku koraji
Keloki noti ta da-m kudadu
Óras ki noti, ta da-m kudadu
N ba xinta frenti tilivizon
Ta odja Rosana Almeida ta da anunsio
Di nos mudjeris KV, rostu piladu, korpu matxukadu
Mudjer foi feta di kostela d’omi
E ka di pé pa nu ser pizadu
E ka di mó pa nu ser maltratadu
E ka di kabesa pa nu ser superior
Dibaxu brasu na ladu korason pa ser amadu.
Dibaxu brasu na ladu korason pa ser amadu
Omis Kabu Verdi ta pega, ta maltrata, ba ta mata
Dibaxu brasu na ladu korason pa ser amadu
Omis Kabu Verdi ta pega, ta maltrata, ba ta mata
Es ta maltrata, es ta mata-nu, es ta maltrata-nu
Intérpretes: Vanilda (vocalista), Suelvia, Vanessa, Nayara, Adriana, Toka, Verónica, Adriana, Bela (torno). Localización: Calheta Son Martinhu, Ribeira Grande de Santiago, Cabo Verde. Data: 27/05/2024
